འདི་ག་ཚགས་པར་ཁང་དུ་གནས་ཚུལ་འབྱོར་གསལ།བོད་རང་སྐྱོང་ལྗོངས་ཀྱི་སྤྱི་ཚོགས་འགན་བཅོལ་ཆ་འཕྲིན་ཅན་གྱི་དོ་དམ་དང་ཞབས་འདེགས་ཞུ་བའི་ནུས་པ་གོང་མཐོར་བཏང་ནས། སྔར་བས་ཡག་པའི་སྒོ་ནས་རྒྱ་ཆེའི་གྲོང་མི་རྣམས་དང་། ཁེ་ལས་དང་བྱ་གཞག་ཚན་པ་ཁག་ལ་ཞབས་འདེགས་ཞུ་ཆེད། རང་ལྗོངས་ཀྱིས་རྒྱལ་སྟོན་ངལ་གསོའི་དུས་ཚོད་དང་བསྟུན་ཏེ། ཟླ་9ཚེས་29ཉིན་ནས་ཟླ་10ཚེས་7ཉིན་བར་སྤྱི་ཚོགས་འགན་བཅོལ་གྱི་ཆ་འཕྲིན་མ་ལག་གི་རིམ་པ་སྤོར་རྒྱུ་རེད།

ཟླ་9ཚེས་29ཉིན་གྱི་ཆུ་ཚོད་ཀླད་ཀོར་ནས་ཟླ་10ཚེས་5ཉིན་གྱི་ཆུ་ཚོད་24བར་མ་ལག་གི་རིམ་པ་སྤོར་རྒྱུ་ཡིན་པས། ལྗོངས་ཡོངས་ཀྱི་གནས་གཏན་འཁེལ་བྱས་པའི་སྨན་དང་སྨན་བཅོས་ཚན་པས་བྱང་བུ་འབྲད་ནས་སྨན་པ་བསྟེན་པ་དང་། སྨན་རྫས་ཉོ་བར་ཞབས་འདེགས་ཞུ་མཚམས་འཇོག་རྒྱུ་རེད། དེའི་རིང་སྨན་པ་ལྟ་བའམ་སྨན་རྫས་ཉོ་དགོས་ཚེ་སྔོན་ལ་རང་ཉིད་ཀྱིས་དངུལ་སྔ་རྟིང་གཏོང་དགོས་ཤིང་། མ་ལག་གི་རིམ་པ་སྤར་རྗེས་གཏན་འབེབས་ལྟར་ཕྱིར་སློག་རྒྱུ།

ཟླ་9ཚེས་29ཉིན་གྱི་ཆུ་ཚོད་ཀླད་ཀོར་ནས་ཟླ་10ཚེས་7ཉིན་གྱི་ཆུ་ཚོད་24བར་གྲོང་ཁྱེར་ཡོངས་ཀྱི་རིམ་ཁག་སྤྱི་ཚོགས་འགན་བཅོལ་ཚན་པས་ལས་སྒོ་གཉེར་མཚམས་འཇོག་རྒྱུ་དང་། གལ་སྲིད་དམིགས་བསལ་གྱི་ལས་སྒོ་གཉེར་དགོས་ཚེ། ལས་དོན་མི་སྣས་བདག་སྤྲོད་བྱ་རྒྱུ་ཡིན་ཞིང་། མ་ལག་གི་རིམ་པ་སྤར་རྗེས་བརྡ་ལན་སྤྲོད་རྒྱུ།