འདི་ག་ཚགས་པར་ཁང་དུ་གནས་ཚུལ་འབྱོར་གསལ།ཉེ་དུས། རང་སྐྱོང་ལྗོངས་ཚན་རིག་ལག་རྩལ་ཐིང་གི་ཐིང་ཀྲང་གཞོན་པ་མ་པིང་ཀང་དང་བཅས་པས་བོད་ལྗོངས་ཁྲོང་པོའོ་མཁའ་སྐྱོད་ཚན་རྩལ་ཚད་ཡོད་ཀུང་སིར་བརྟག་ཞིབ་ཏུ་ཕེབས་པ་དང་འབྲེལ་བོད་ལྗོངས་ཚན་རྩལ་ཁྱབ་ཁོངས་ཀྱི་དམའ་དབྱིངས་དཔལ་འབྱོར་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་ཀྱི་བཞུགས་མོལ་ཚོགས་འདུ་འཚོགས་པ་རེད། གྲོང་སྤྱི་གཞོན་པ་འཇམ་དགའ་དང་། ཚེ་རིང་གཡང་འཛོམས་ཀྱིས་རྟོག་ཞིབ་དང་བཞུགས་མོལ་ཚོགས་འདུར་ཞུགས། བཞུགས་མོལ་ཚོགས་འདུའི་ཐོག འཇམ་དགས། ལྷོ་ཁ་གྲོང་ཁྱེར་གྱིས་རིགས་གཅིག་མཁས་ཅན་གྱི་བསམ་འཆར་གསེད་བཀྲོལ་དང་བསྡུ་ལེན་ནན་ཏན་བྱས་ཏེ་ཆེད་དོན་སྙན་ཞུ་བཟོས་ནས་དམའ་དབྱིངས་དཔལ་འབྱོར་ཐོན་ལས་འཕེལ་རྒྱས་ལ་གནད་སྨིན་མཛུབ་ཁྲིད་བྱ་རྒྱུ་དང་ས་མཐོའི་བལྟོས་བཅས་རྣམ་པའི་བཀོལ་སྤྱོད་ཀྱི་མི་མངོན་པའི་སྟོབས་ཤུགས་སྔོག་འདོན་གཏིང་ཟབ་བྱས་ཐོག འགྲན་རྩོད་ནུས་པ་ཆེན་པོ་ལྡན་པའི་ཐོན་ལས་ཀྱི་ལེགས་ཆ་ནུས་ཤུགས་ཡོད་རྒུས་བཏོད་དེ་དམའ་དབྱིངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཡོང་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་རྒྱུ་ཡིན་ཞེས་ཆོད་སེམས་བསྟན་པ་རེད། མ་པིང་ཀང་གིས། ལྷོ་ཁ་གྲོང་ཁྱེར་གྱིས་"གསར་གཏོད་གཉིས་མཉམ་འདྲེས་གཏིང་ཟབ་བྱེད་པའི་"བཀོད་སྒྲིག་ལ་དམིགས་ནས་ཐོན་ལས་མ་དངུལ་དང་ཚན་རྩལ་དངུལ་རྩ། དེ་བཞིན་སྤྱི་ཚོགས་ཀྱི་མ་རྩ་བཅས་མཉམ་འགུལ་བྱས་ཏེ་མཉམ་འདྲེས་འཕེལ་རྒྱས་ཀྱི་མཉམ་ཤུགས་ཆེན་པོ་ཞིག་ཆགས་པ་བྱས་ནས་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་གཏོང་རྒྱུའི་གྲོས་འཆར་གསུངས་པ་རེད།།

ཡེ་ཤེས་བཟང་མོས་བསྒྱུར། བསོད་བདེས་ཞུས།