བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཀརྨ་ཚེ་བརྟན་གྱིས་ལྷོ་ཁ་གྲོང་ཁྱེར་དུ་རྒྱལ་ཡོངས་ཚོགས་འདུ་གཉིས་ཀྱི་དགོངས་དོན་སྒྲོག་འགྲེལ་དང་སྦྲགས་བརྟག་ཞིབ་གནང་བ་རེད།
སྣེ་གདོང་ཆུས་དང་། མཚོ་སྣ་གྲོང་ཁྱེར། མཚོ་སྨད་རྫོང་། ལྷུན་རྩེ་རྫོང་བཅས་སུ་ཀརྨ་ཚེ་བརྟན་གྱིས་གཞི་རིམ་མང་ཚོགས་དང་ཐད་ཀར་སྤེལ་རེས་གནང་སྟེ་ཡོང་འབབ་དང་འཕེལ་རྒྱས་ཀྱི་སྐོར་གླེང་བ་མ་ཟད། རྒྱལ་ཡོངས་ཚོགས་འདུ་གཉིས་ཀྱི་དགོངས་དོན་སྒྲོག་འགྲེལ་གནང་བ་རེད། ཁོང་གིས། བོད་ཀྱི་དམངས་ཕན་སྲིད་ཇུས་ཚང་མའི་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་དམིགས་བསལ་ཐུགས་ཁུར་འདུས་ཡོད། ང་ཚོས་ཕན་པ་གང་ནས་བྱུང་བ་དང་བཀའ་དྲིན་སུ་ལ་འཇལ་དགོས་ལུགས་ཤེས་དགོས་པ་མ་ཟད། བློ་བརྟན་འགྱུར་མེད་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱེད་དགོས་ཞེས་གསུངས་ཤིང་། གཞན་ཡང་ཀརྨ་ཚེ་བརྟན་གྱིས། རྨང་གཞིའི་སྒྲིག་བཀོད་འཛུགས་སྐྲུན་དང་སྤྱི་པའི་ཞབས་ཞུའི་ཆུ་ཚད་མཐོ་རུ་བཏང་ནས་མཐའ་མཚམས་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་གཏོང་བ་དང་། མི་སེར་གྱི“རེ་སྒུག་བྱེད་པའི་དོན་དག”སྲིད་གཞུང་གིས“སྒྲུབ་དགོས་པའི་དོན་དག”ལ་བརྩིས་ནས་མང་ཚོགས་ཀྱི་ཐོབ་སྣང་དང་བློ་ཡིད་ཚིམ་ཚད་རྒྱུན་ཆད་མེད་པར་ཆེ་རུ་གཏོང་དགོས་པའི་བཀའ་མངགས་ཡང་ཡང་གནང་བ་རེད།
ཡུལ་སྨད་ཤང་ཡུལ་སྨད་གྲོང་ཚོར་ཀརྨ་ཚེ་བརྟན་གྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་དེ་བཞིན་ཧྲུའུ་ཅི་ཝང་ཅུན་ཀྲེང་གི་ཚབ་ཞུས་ནས་（པར་ངོས་གསུམ་པར་གཟིགས） （པར་ངོས་དང་པོར་མཐུད）ཆེད་མངགས་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ་གཟིགས་པ་དང་འཚམས་འདྲི་གནང་བ་དང་། ཡུལ་སྨད་ཤང་གི་རྒྱལ་གཅེས་མཐའ་སྲུང་གི་སྔོན་ཐོན་བྱས་རྗེས་འགྲེམས་སྟོན་ཁང་ལ་གཟིགས་སྐོར་གནང་ཞིང་། སྒྲོལ་དཀར་དང་གཡང་འཛོམས་ཁྱིམ་ཚང་གི་རྒྱལ་གཅེས་མཐའ་སྲུང་གི་སྔོན་ཐོན་བྱས་རྗེས་ལ་གུས་འདུད་ཞུས་པ་དང་། ཁོང་ཚོར་མུ་མཐུད་མིག་དཔེའི་ནུས་པ་བཏོན་ནས་རྒྱལ་གཅེས་མཐའ་སྲུང་གི་སྙིང་སྟོབས་དར་སྤེལ་གཏོང་བ་དང་། ལས་བྱེད་པ་དང་མང་ཚོགས་དེ་བས་མང་བར་སྐུལ་ཁྲིད་ཀྱིས་སྐལ་བཟང་མེ་ཏོག་དང་འདྲ་བར་གངས་ལྗོངས་ཀྱི་མཐའ་མཚམས་སུ་རྩ་བ་ཚུགས་ཏེ་མེས་རྒྱལ་མངའ་ཁོངས་ཀྱི་རྩྭ་རྩི་ཤིང་ཚུན་ཆད་ལ་སྲུང་སྐྱོང་ཡག་པོ་བྱ་རྒྱུའི་ལྕག་སྐུལ་གནང་ཡོད།
མཚོ་སྣ་གྲོང་ཁྱེར་སླད་ཤང་གི་ཇ་རར་ཀརྨ་ཚེ་བརྟན་གྱིས་སྤུས་ཀ་གཙོ་བོར་འཛིན་པ་མཐའ་འཁྱོངས་བྱས་ཏེ་ཞིབ་ཚགས་ཅན་གྱི་དོ་དམ་ལ་ཤུགས་སྣོན་རྒྱག་པ་དང་། ཁེ་ཕན་སྦྲེལ་མཐུད་ལམ་སྲོལ་འཐུས་སྒོ་ཚང་དུ་གཏོང་བ། “ཡུལ་ཟོག”གི་ལས་དོན་ཡག་པོ་སྒྲུབ་པ་བཅས་བྱས་ནས་ཐོན་ཁུངས་ཀྱི་ལེགས་ཆ་དེ་འཕེལ་རྒྱས་ཀྱི་ལེགས་ཆར་བསྒྱུར་དགོས་ཞེས་གསུངས་པ་རེད།
ལྷུན་རྩེ་རྫོང་རྩ་རི་གྲོང་རྡལ་དུ་ཀརྨ་ཚེ་བརྟན་གྱིས་ཡུལ་དེ་གས་ཁྱད་ལྡན་ཐོན་ཁུངས་ལ་བརྟེན་ནས་རིག་གནས་དང་ཡུལ་སྐོར་ཐོན་ལས་འཕེལ་རྒྱས་བཏང་ཚུལ་ལ་མཁྱེན་རྟོགས་གནང་ཞིང་། ཁོང་གིས་ཡུལ་སྐོར་ཐོན་རྫས་མཁོ་སྤྲོད་ཕུན་སུམ་ཚོགས་སུ་གཏོང་བ་དང་། ཡུལ་སྐོར་གྱི་ལས་རྣམ་དང་འཛད་སྤྱོད་ཀྱི་རྣམ་པ་གསར་གཏོད། ཡུལ་སྐོར་དུ་ཡོང་མཁན་མང་དུ་འགྲོ་བར་ཤུགས་སྣོན་རྒྱག་པ། ཞབས་ཞུའི་སྤུས་ཚད་དང་དོ་དམ་གྱི་ཆུ་ཚད་རྒྱུན་མཐུད་མཐོ་རུ་གཏོང་བ་བཅས་བྱས་ནས། མི་སེར་ལ“ཡུལ་སྐོར་གྱི་ཡོང་འབབ”གསོག་པ་དང་འཚོ་བ་ཡག་པོ་སྐྱེལ་ཐུབ་པར་བྱེད་དགོས་པའི་ནན་བཤད་གནང་བ་རེད།
ལྷུན་རྩེ་རྫོང་རི་ཐང་གྲོང་རྡལ་དར་ཤིང་གྲོང་ཚོར་ཀརྨ་ཚེ་བརྟན་གྱིས་ས་ཞིང་གི་སེར་ལངས་ཚུལ་ལ་གཟིགས་པ་དང་། དཔྱིད་རྨོད་དཔྱིད་འདེབས་བྱེད་བཞིན་པའི་གཞི་རིམ་མང་ཚོགས་དང་སྤེལ་རེས་གཏིང་ཟབ་གནང་ཞིང་། ཁོང་གིས་ཞིང་བརྟེན་འབྲུ་གསོག་དང་རྩལ་བརྟེན་འབྲུ་གསོག་མཐའ་འཁྱོངས་བྱས་ཏེ་ཚད་གཞི་མཐོ་བའི་ཞིང་ས་འཛུགས་སྐྲུན་ལ་སྐུལ་འདེད་ཏན་ཏིག་གཏོང་བ་དང་། སོན་བཟང་དང་བྱེད་ཐབས་བཟང་པོ་ཁྱབ་སྤེལ་གཏོང་ཤུགས་ཆེ་རུ་གཏོང་བ། ཞིང་ལས་རྒྱུ་ཆ་མཁོ་སྤྲོད་དང་ཞིང་ལས་ལག་རྩལ་ཞབས་ཞུར་ཤུགས་སྣོན་རྒྱག་པ་བཅས་བྱས་ནས། ལོ་ཧྲིལ་པོར་འབྲུ་རིགས་ལོ་ལེགས་ཡོང་བར་རྨང་གཞི་བརྟན་པོ་འདིང་དགོས་པའི་ནན་བཤད་གནང་བ་རེད།
