འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཟླ་3པའི་ཚེས་19ཉིན། གྲོང་ཁྱེར་ཡོངས་ཀྱི་སྲིད་ཁྲིམས་ཁོངས་གཏོགས་སུ་སྤྱོད་ཚུལ་ལེགས་གཏོང་དང་དོན་འཁྱོལ་དམ་འཛིན་བྱེད་པའི་ལས་དོན་གྱི་སྐུལ་འདེད་ཚོགས་འདུ་བསྐོང་འཚོགས་བྱས་ཤིང་། ཚོགས་འདུའི་ཐོག ཞི་ཅིན་ཕིང་གི་ཕྱོགས་ཡོངས་ནས་ཏང་ནན་པོས་སྐྱོང་བ་དང་། ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད། ལས་བྱེད་པའི་དཔུང་ཁག་འཛུགས་སྐྱོང་བཅས་ཀྱི་རྣམ་བཤད་དང་། དེ་བཞིན་ལྗོངས་ཏང་ཨུད་ཀྱི་སྤྱོད་ཚུལ་ལེགས་གཏོང་དང་དོན་འཁྱོལ་དམ་འཛིན་བྱེད་པའི་ལས་དོན་གྱི་སྐུལ་འདེད་ཚོགས་འདུའི་དགོངས་དོན། གྲོང་ཁྱེར་སྒྲིག་ཨུད་ལྟ་ཞིབ་ཞུད་ཀྱི་འབྲེལ་ཡོད་བརྡ་ཁྱབ་དགོངས་དོན་བཅས་བརྒྱུད་བསྒྲགས་སློབ་སྦྱོང་བྱས་པ་རེད།
གྲོང་ཨུད་རྒྱུན་ཨུ། སྲིད་ཁྲིམས་ཨུད་ཀྱི་ཧྲུའུ་ཅི། གྲོང་ཁྱེར་སྤྱི་བདེ་ཅུད་ཏང་ཨུད་ཀྱི་ཧྲུའུ་ཅི་བཅས་ཡིན་པའི་བཀྲ་ཤིས་ཕུན་ཚོགས་ཀྱིས་ཚོགས་འདུ་གཙོ་སྐྱོང་དང་འབྲེལ་གསུང་བཤད་གནང་བ་རེད།
བཀྲ་ཤིས་ཕུན་ཚོགས་ཀྱིས་ནན་བཤད་གནང་དོན། གྲོང་ཁྱེར་ཡོངས་ཀྱི་སྲིད་ཁྲིམས་ཁོངས་གཏོགས་ལས་བྱེད་པས་ཆབ་སྲིད་ཀྱི་རང་རྟོགས་དང་སྒྲིག་སྲོལ་གྱི་འདུ་ཤེས། སྒྲིག་ཁྲིམས་ཀྱི་ལྟ་བ་བཅས་ཟབ་ཏུ་བཏང་སྟེ། ཚད་གཞི་དེ་བས་ནན་པ་དང་། བྱ་ཐབས་དེ་བས་དོ་དམ་པ། སྒྲིག་ཁྲིམས་དེ་བས་དམ་ནན་བཅས་ཀྱི་སྤྱོད་ཚུལ་ཡག་པོའི་ཐོག་ནས་གྲོང་ཁྱེར་ཡོངས་ཀྱི་བསྒྱུར་འཕེལ་བརྟན་གསུམ་ལ་འགན་ལེན་ནུས་ལྡན་མཁོ་འདོན་བྱེད་དགོས། བཅོས་སྒྲིག་གནད་དོན་ཁྲིད་ཕྱོགས་སུ་བསྟེན་ཏེ། ལས་ཀའི་ཕན་འབྲས་དང་སྤུས་ཚད་མཐོར་འདེགས་ལ་བརྩོན་དགོས། རྩ་དོན་ལག་བསྟར་བྱེད་པའི་རེ་འདུན་གཞིར་བཟུང་། སྤྱོད་ཚུལ་ལེགས་གཏོང་དང་དོན་འཁྱོལ་དམ་འཛིན་ཟབ་སྤེལ་བརྒྱུད། མང་ཚོགས་ཀྱི་བདེ་སྐྱིད་སྟོན་གྲངས་མཐོར་འདེགས་ལ་ནུས་ཤུགས་ཟམ་མི་ཆད་པར་འདོན་སྤེལ་བྱེད་དགོས། འགོ་ཁྲིད་ལ་ཤུགས་སྣོན་དང་འགན་འཁྲི་ཡག་པོ་འཁུར་བ། ལྟ་སྐུལ་ཁྲིད་སྟོན་དང་ཞིབ་བཤེར་ལ་ཤུགས་སྣོན། ཁོར་ཡུག་བཟང་པོ་གཏོད་པ་བཅས་ཀྱི་ཐོག་ནས་ལྷོ་ཁའི་ཡུན་རིང་བདེ་འཁོད་དང་སྤུས་མཐོའི་གོང་འཕེལ་ཆེད་ལེགས་སྐྱེས་གསར་པ་དེ་བས་མང་བ་འབུལ་དགོས།
