འདི་ག་ཚགས་པར་ཁང་དུ་གནས་ཚུལ་འབྱོར་གསལ།དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ཉེར་ཡོད་པའི་སྐབས་སུ་ཟླ་1ཚེས་23ཉིན་གྲོང་ཨུད་རྒྱུན་ཨུ། དྲུང་ཆེ། གྲོང་ཁྱེར་ཐད་གཏོགས་ལས་ཨུད་ཀྱི་ཧྲུའུ་ཅི་ཨན་ཤིན་གོ་ཡིས་སྔ་རྗེས་སུ་བདེ་སྐྱིད་ཁུལ་ཆུང་དང་གྲོང་ཁྱེར་སྤྱི་བདེ་ཅུས་སུ་ཕེབས་ནས་ཏང་ཡོན་རྒན་གྲས་དང་དཀའ་ངལ་ཡོད་པའི་ཏང་ཡོན་ལ་འཚམས་འདྲི་གནང་བ་དང་འབྲེལ་ཏང་དང་སྲིད་གཞུང་གི་ཐུགས་ཁུར་དང་འཚོ་འཚིས་སྐྱེལ་གནང་བ་རེད།
ཏང་ཡོན་རྒན་གྲས་ནོར་བསྟན་གྱི་ཁྱིམ་དུ། ཨན་ཤིན་གོ་ཡིས་བྱམས་བརྩེ་ཆེན་པོས་བགྲེས་སོང་གི་གཟུགས་གཞི་དང་འཚོ་བའི་གནས་ཚུལ་བཀའ་འདྲི་གནང་བ་མ་ཟད། སྐུ་གཟུགས་ལ་བདག་གཅེས་དང་དཀའ་ངལ་འཕྲད་སྐབས་དུས་ཐོག་ཏུ་རྩ་འཛུགས་ལ་སྙན་སེང་ཞུ་དགོས་པའི་མངགས་བཅོལ་ཡང་གནང་བ་དང་སྦྲགས། ཏང་ཡོན་རྒན་གྲས་ཚོས་སྔར་བཞིན་ལྷོ་ཁའི་བྱ་གཞག་ཁག་གི་འཕེལ་རྒྱས་ལ་དོ་ཁུར་དང་རྒྱབ་སྐྱོར་གནང་ནས་ལྷོ་ཁའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ཐབས་ཇུས་གང་ཡོད་འདོན་རྒྱུའི་རེ་བ་ཡོད་ཅེས་གསུངས།
གྲོང་ཁྱེར་སྤྱི་བདེ་ཅུས་སུ་ཨན་ཤིན་གོ་ཡིས་དཀའ་ངལ་ཡོད་པའི་ཏང་ཡོན་ཝང་རུང་གི་ཁྱིམ་ཚང་གི་གཞི་རྩའི་གནས་ཚུལ་དང་མིག་སྔར་ལྷག་པའི་དཀའ་ངལ་ཤེས་རྟོགས་ཞིབ་ཕྲ་གནང་ཞིང་། ཝང་རུང་གིས་དཀའ་ངལ་ལ་བློ་སྟོབས་ཆེན་པོས་ཁ་གཏད་གཅོག་པ་དང་། སྙིང་སྟོབས་མི་ཉམས་པ། ཡིད་ཆེས་འཕེལ་བ་བཅས་བྱས་ནས་ཀྲུང་གོ་གུང་ཁྲན་ཏང་གི་འགོ་ཁྲིད་དང་རྩ་འཛུགས་ཀྱི་ཐུགས་ཁུར་འོག་དཀའ་ངལ་སེལ་ཐུབ་པའི་ཡིད་ཆེས་བརྟན་པོ་བྱེད་དགོས་པའི་ལྕག་སྐུལ་གནང་བ་རེད།
བདེ་སྐྱིད་དཔལ་སྒྲོལ་གྱིས་བསྒྱུར། བསོད་ཡེས་ཞུས།
