（པར་ངོས་དང་པོར་མཐུད） ཚོགས་འདུའི་ཐོག་ངེད་གྲོང་ཁྱེར་གྱི་ཧྲེ་ཀྲང་གཞོན་པ་མའུ་ཡུང་ཝུན་གྱིས་ངོ་སྤྲོད་བྱས་པར། ལོ་60ཡི་རིང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བྱམས་བརྩེའི་ཐུགས་ཁུར་དང་། རྒྱལ་ཡོངས་མི་དམངས་དང་ལྷག་པར་དུ་ཧུའུ་ནན་དང་། ཧུའུ་པེ། ཨན་ཧུའེ། ཀྲུང་གོ་འབྲུ་རིགས་ཚོགས་པ་བཅས་ཀྱི་ཤུགས་ཆེའི་རོགས་སྐྱོར་འོག་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་སྲ་ཞིང་བརྟན་པའི་འགོ་ཁྲིད་བཅས་ཀྱི་འོག གྲོང་ཨུད་དང་གྲོང་ཁྱེར་སྲིད་གཞུང་གིས་གྲོང་ཁྱེར་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ། བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་མཛད་ཕྱོགས་དང་རང་སྐྱོང་ལྗོངས་ཀྱི་ཐབས་ཇུས་བཀོད་སྒྲིག་ཁག་ལག་བསྟར་དོན་འཁྱོལ་ཏན་ཏིག་བྱས་ནས། བློ་བརྟན་འགྱུར་མེད་ངང་བརྟན་ལྷིང་ལ་སྲུང་སྐྱོང་དང་། འཕེལ་རྒྱས་ལ་སྐུལ་འདེད། དམངས་འཚོར་ཕན་འདོགས་པ། རྨང་གཞི་བརྟན་གཏོང་། སྒོ་མོ་རྒྱ་ཆེར་དབྱེ་བ་བཅས་བྱས་པ་ལས་བྱ་གཞག་ཁག་ལ་སྐྱེ་བོ་ཀུན་གྱིས་དོ་སྣང་བྱེད་པའི་འོད་སྟོང་འབར་བའི་གྲུབ་འབྲས་ཐོབ་ཡོད།

མིག་སྔར། ངེད་གྲོང་ཁྱེར་གྱི་རྨང་གཞིའི་སྒྲིག་བཀོད་འཛུགས་སྐྲུན་གྱི་ལས་དོན་ཕྱོགས་ཡོངས་ནས་སྤེལ་འགོ་བཙུགས་ཏེ། ངེད་གྲོང་ཁྱེར་གྱི་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ལ་རྨང་གཞི་བརྟན་པོ་ཞིག་བཏིངས་པ་དང་། ཐོན་ལས་འཕེལ་རྒྱས་ལ་སྐུལ་འདེད་བརྟན་པོ་བཏང་བ་ལས་ཅུང་སྲ་ཞིང་བརྟན་པའི“གཉིས་གསུམ་གཅིག”གི་ཐོན་ལས་རྣམ་པ་ཞིག་ཆགས་པ། གྲོང་ཁྱེར་ཡོངས་ཀྱི་ཡིག་ཚགས་དང་གཱ་བཟོས་པའི་མི་འབོར་དབུལ་པོ57844ཡི་ནང་ནས་དབུལ་པོ་52705དབུལ་སྒྲོལ་ཐུབ་པ་དང་རྫོང་དང་ཆུས་བཅུ་གཉིས་ཚང་མ་དབུལ་སྒྲོལ་ཐུབ་ཡོད། རྒྱལ་ཁབ་ཀྱི་སྣོད་བཅུད་ཤེས་དཔལ་སྔོན་ཐོན་དཔེ་སྟོན་ཁུལ་གཞི་རྩའི་ཆ་ནས་བསྐྲུན་ཟིན་པ་དང་། གྲོང་ཁྱེར་དང་། རྫོང་། ཤང་། གྲོང་ཚོ་བཅས་རིམ་པ་བཞིའི་ཆུ（མཚོ）དཔོན་ལམ་ལུགས་མ་ལག་ཕྱོགས་ཡོངས་ནས་བསྐྲུན་ཟིན་པ། གྲོང་ཁྱེར་ཡོངས་ཀྱི་སྐྱེད་ཚལ་ཉར་ཚགས་རྒྱ་ཁྱོན་མུའུ་ཁྲི་150ལྷག་ཙམ་ཟིན་པ། འདམ་རའི་རྒྱ་ཁྱོན་ཧ་ལམ་སྤྱི་ཆིང་ཁྲི་23.92ཟིན་པ། ནགས་ཚལ་ཁྱབ་ཚད་24.79%ཟིན་པ། གྲོང་ཁྱེར་དང་གྲོང་གསེབ་ཀྱི་རྣམ་པ་གསར་རྐྱང་དུ་གྱུར་པ་དང་། སྤྱི་ཚོགས་ཀྱི་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པ། མི་རིགས་ཁག་གི་མང་ཚོགས་ཀྱིས་སྒྱུར་བཅོས་སྒོ་དབྱེའི་གྲུབ་འབྲས་ལ་ལོངས་སུ་སྤྱད་ནས་མི་དམངས་ཀྱི་འཚོ་བའི་ཆུ་ཚད་ཇེ་མཐོར་སོང་ཡོད།