ཡངས་ཤིང་རྒྱ་ཆེ་བའི་ཨེ་ཆུ་མདོ་རྒྱང་གི་རི་འདབས་ཀྱི་གངས་ད་དུང་བཞུར་འཕྲོ་ལུས།
ཟླ་4པའི་ཚེས་14ཉིན་ནི་གཟའ་ཟླ་བ་རེད། ཆུ་གསུམ་རྫོང་ཆུ་མདོ་རྒྱང་ཤང་རྫོང་ཞོལ་གྲོང་ཚོའི་ཚབ་འཁྲིད་དགེ་རྒན་བསོད་ནམས་རྡོ་རྗེས་ཉིན་དེའི་ཞོགས་པ་སྔ་མོ་ནས་སྦག་སྦག་བཞོན་པའི་གཟུགས་བརྙན་དེ་སླར་ཡང་ཤང་གྲོང་དེའི་ལམ་སྟེང་དུ་མངོན། ལམ་བར་ཁོང་གིས་སློབ་གྲྭའི་ནང་ལས་ཀ་མང་དག་བྱེད་རྒྱུར་ལུས་པ་དྲན་དུས་རང་འགུལ་ངང་སྦག་སྦག་གི་མྱུར་ཚད་མགྱོགས་སུ་བཏང་།
གཟའ་མཇུག་སླེབས་རིམ་བཞིན་བསོད་ནམས་རྡོ་རྗེས་རྒྱང་ཐང་གྲོང་ཚོར་གནས་པའི་ཁྱིམ་ནས་རྫོང་ཞོལ་གྲོང་ཚོར་འགྲོ་འོང་ཐེངས་གཅིག་བྱེད་དགོས་ཤིང་། དུས་ཡུན་ཆུ་ཚོད་གཉིས་ཡས་མས་འགོར་གྱི་ཡོད་པའི་ལམ་དེའི་སྟེང་ཁོ་པས་ཐེངས་ག་ཚོད་བསྐྱོད་མྱོང་མི་དྲན།
ལོ་ངོ་23ཚུན། བསོད་ནམས་རྡོ་རྗེས་གཞི་རིམ་དུ་གཞི་རྐང་ཚུགས་ཏེ། ཨེ་ཆུ་མདོ་རྒྱང་གི་སློབ་འཁྲིད་ཚིགས་མང་པོར་ཚབ་འཁྲིད་དགེ་རྒན་གྱི་ལས་འགན་དང་དུ་བླངས་ཡོད་པ་དང་། ལས་གནས་དཀྱུས་མ་དེའི་སྟེང་བློ་གཅིག་སེམས་གཅིག་གིས་དེ་ཁུལ་བུ་ཕྲུག་མང་དག་ཅིག་གསོ་སྐྱོང་བྱས་ཡོད་པ་རེད།
རྫོང་ཞོལ་སློབ་འཁྲིད་ས་ཚིགས་སུ་བསྐྱོད་སྐབས། རོལ་རྩེད་བྱེད་བཞིན་པའི་བུ་ཕྲུག་ཚོས་ལམ་སེང་གསར་འགོད་པར་མ་གྲོས་གཅིག་མཐུན་སྒོ་ནས་འཚམས་འདྲི་བྱེད་བཞིན་འདུག
སྒོ་ར་ཆུང་ཆུང་ཞིག་དང་སློབ་ཁང་དཀྱུས་གཅིག་ལ་བརྩེགས་པའི་ནང་། བུ་ཕྲུག་ཚོས་དུས་རྒྱུན་འདི་གར་སློབ་ཚན་ཉན་པ་དང་། ཁ་ལག་ཟོས་པ། རྩེད་མོ་རྩེ་བ་བཅས་ཀྱིས་གནས། ད་ལྟའི་ཆར། རྫོང་ཞོལ་སློབ་འཁྲིད་ས་ཚིགས་སུ་བུ་ཕྲུག་ཁྱོན་9ཡོད་ཅིང་། ཁོང་ཚོའི་ན་སོ་ལོ་4ནས་ལོ་8ཀྱི་བར་ཡིན་པ་རེད།
ཁོང་ཚོའི་དགེ་རྒན་བསོད་ནམས་རྡོ་རྗེའི་གཟུགས་ཚད་རིང་ཞིང་ཤ་རིད་པ། ངོ་གདོང་སྨུག་ནག་ཅན་ཞིག་དང་། འདི་ལོ་ལོ་ན་52ལ་གསོན་པའི་ཁོང་ནི་དུས་རྒྱུན་སྨྲ་བ་ཉུང་ཡང་གཞན་ལ་གུས་ཞབས་ཆེས་ཆེར་ལྡན་པ་ཞིག་རེད། （པར་ངོས་གསུམ་པར་གཟིགས）
བསོད་ནམས་རྡོ་རྗེས་སློབ་གསོའི་ལས་གནས་ཐོག་མི་གསར་སྐྱོང་བའི་ཟུར་ཞིག
