བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཟླ་6པའི་ཟླ་མཇུག་བར་བོད་ཀྱི་དངུལ་རྩའི་སྒྲིག་གཞིའི་དངུལ་བུན་ལྷག་གྲངས་སྒོར་དུང་ཕྱུར་4389.2ཟིན་པ་དེ་ལོ་གོང་མའི་དུས་མཚུངས་ལས་སྒོར་དུང་ཕྱུར་853.8འཕར་སྣོན་བྱུང་ནས་བརྒྱ་ཆ་24.2འཕར་བ་དང་འཕར་ཚད་རྒྱལ་ཡོངས་ལས་བརྒྱ་ཆའི་གྲངས་12.1གིས་མཐོ་བ་ཡོད་པ་རེད།

བོད་ཀྱི་དངུལ་རྩའི་སྒྲིག་གཞིའི་དངུལ་བུན་ལྷག་གྲངས་ཁག་ལོ་སྟོད་ལས་སྒོར་དུང་ཕྱུར་345.6འཕར་སྣོན་བྱུང་བ་དང་། གསར་དུ་འཕར་བའི་དངུལ་བུན་གཙོ་བོ་ཐོན་ལས་གསུམ་པར་བཏང་བ་དང་། ཟླ་6པའི་ཟླ་མཇུག་ཏུ་ཐོན་ལས་གསུམ་པའི་དངུལ་བུན་ལྷག་གྲངས་སྒོར་དུང་ཕྱུར་2236.1ཟིན་པ་དེ་ལོ་གོང་མའི་དུས་མཚུངས་ལས་བརྒྱ་ཆ་42.3འཕར་བ་དང་འཕར་ཚད་སྤྱིའི་དངུལ་བུན་འཕར་ཚད་ལས་བརྒྱ་ཆ་18.1གིས་མཐོ་བ་ཡོད། ལོ་སྟོད་དུ་ཐོན་ལས་གསུམ་པའི་དངུལ་བུན་སྒོར་དུང་ཕྱུར་237.7འཕར་བ་དེས་གསར་འཕར་དངུལ་བུན་བསྡོམས་འབོར་གྱི་བརྒྱ་ཆ་68.8བཟུང་བ་དང་བཟུང་ཚད་ལོ་གོང་མའི་དུས་ཚུངས་ལས་བརྒྱ་ཆའི་གྲངས་9.8ཀྱིས་མཐོ་བ་ཡོད་པ་རེད།ཟླ་6པའི་ཟླ་མཇུག་བར་གསར་འཕར་དངུལ་བུན་གཙོ་བོ་གློག་ཤུགས་དང་། ཚ་ཤུགས། སོལ་རླངས། ཆུའི་ཐོན་སྐྱེད། མཁོ་སྤྲོད་ལས་རིགས། འགྲིམ་འགྲུལ་སྐྱེལ་འདྲེན། བཀར་འཇུག སྦྲག་སྲིད་ལས་རིགས། བོགས་གཏོང་ལས་རིགས། ཚོང་དོན་ཞབས་ཞུ་ལས་རིགས་སོགས་ཀྱི་ཐོན་ལས་ལ་བཏང་ཡོད། གོང་གསལ་གྱི་ལས་རིགས་གསུམ་པོའི་གསར་འཕར་དངུལ་བུན་བསྡོམས་འབོར་སྒོར་དུང་ཕྱུར་290.9ཟིན་པ་དེས་གསར་འཕར་དངུལ་བུན་བསྡོམས་འབོར་གྱི་བརྒྱ་ཆ་84.2བཟུང་ཡོད་པ་རེད།