མི་དམངས་དྲ་བའི་ཐོག་གནས་ཚུལ་སྤེལ་བར་གཞིགས་ན།ཉེ་བའི་ལོ་འགའི་རིང་ལ་རྩད་ཆོད་པའི་ཕྱི་དངུལ་སྒྲིག་འགལ་ཐད་ཀྱི་དཔེ་མཚོན་གྱོད་དོན་27ཕྱི་ཕྱོགས་ལ་བརྡ་ཁྱབ་བཏང་ཡོད་པར་མ་ཟད། ད་དུང་སླར་ཡང་ཕྱི་དངུལ་ཚོང་རའི་སྒྲིག་ལམ་བཟང་པོ་སྲུང་སྐྱོང་ནན་པོ་བྱ་དགོས་པ་ནན་བཤད་བྱས་པ་རེད།

དཔེ་མཚོན་གྱོད་དོན་འདི་རིགས་ཀྱི་སྒྲིག་འགལ་བྱེད་མཁན་གཙོ་བོའི་ནང་དུ་དངུལ་ཁང་དང་། ཕྱོགས་གསུམ་པའི་གཏོང་སྤྲོད་ལས་ཁུངས། ཕྱིར་གཏོང་ནང་འདྲེན་བྱེད་མཁན་ཚོང་པ། དེ་བཞིན་རང་བྱུང་མི་སོགས་འདུས་ཡོད་པ་དང་། དེའི་ཁྲོད་དུ་གཏོང་སྤྲོད་ནོར་མཛོད་(ཀྲི་ཧྥུའུ་པའོ)དང་ནོར་སྤྲོད་ཀུན་སྤྱོད་(ཚའེ་ཧྥུའུ་པའོ)ཀྱང་ཚུད་ཡོད།

ད་ལོ་ནས་བཟུང་། རྒྱལ་ཁབ་ཕྱི་དངུལ་དོ་དམ་ཅུས་ཀྱིས་གཏིང་ཟབ་པའི་ངང་ཕྱི་དངུལ་དོ་དམ་སྒྱུར་བཅོས་སྒོ་དབྱེ་ཟབ་སྤེལ་དང་། དངོས་ཡོད་ཀྱི་དཔལ་འབྱོར་འཕེལ་རྒྱས་ལ་རྒྱབ་སྐྱོར་བྱས་པའི་དུས་མཚུངས་སུ་ཕྱི་དངུལ་ཁྲོམ་རའི་སྒྲིག་ལམ་ཡག་པོ་སྲུང་སྐྱོང་བྱས་ནས། དངུལ་ཁང་དང་ཕྱོགས་གསུམ་པའི་གཏོང་སྤྲོད་ལས་ཁུངས། ཁེ་ལས་བརྒྱུད་སྤྲོད་ཉོ་ཚོང་སོགས་བྱེད་པོ་དང་ལས་སྒོ་གཙོ་བོར་དམིགས་ཏེ་ཆེད་དོན་ཞིབ་བཤེར་བྱས་ཤིང་། ཕྱི་དངུལ་ཐད་སྒྲིག་འགལ་ལུགས་འགལ་གྱི་བྱ་སྤྱོད་སྣ་ཚོགས་ལ་རྡུང་རྡེག་དྲག་པོ་བཏང་བ་རེད།

ད་ལོའི་ལོ་སྟོད་དུ་རྒྱལ་ཁབ་ཕྱི་དངུལ་དོ་དམ་ཅུས་ཀྱིས་ཕྱི་དངུལ་སྒྲིག་འགལ་གྱོད་དོན་1354རྩད་བཅད་པ་དང་། མི་དམངས་ཤོག་སྒོར་དུང་ཕྱུར3.54ཆད་པ་བཅད་པ་དང་གཞུང་བཞེས་བཏང་ཞིང་། ལོ་གོང་མའི་དུས་མཉམ་དང་བསྡུར་ན་སོ་སོར་བརྒྱ་ཆ་19.7དང་བརྒྱ་ཆ་59.5འཕར་ཡོད། དེའི་ནང་དུ་དངུལ་རྩའི་ལས་ཁུངས་ཀྱི་སྒྲིག་འགལ་གྱོད་དོན་455དང་། ཁེ་ལས་ཀྱིས་སྒྲིག་འགལ་གྱོད་དོན་340 མི་སྒེར་གྱི་སྒྲིག་འགལ་གྱོད་དོན་559བཅས་ཞིབ་གཅོད་བྱས་ཡོད།