འདི་ནི་མུའུ་ཡུས་ཅུན་སྐུ་འཚོ་ཞུགས་སྐབས་ལྕེའུ་སྨད་གྲོང་ཚོའི་མང་ཚོགས་དང་མཉམ་དུ་རི་ཉིལ་བའི་ས་གཤིས་གནོད་འཚེའི་མངོན་མེད་རྐྱེན་ངན་ལ་བརྟག་ཞིབ་གནང་བཞིན་པ།

1996ལོའི་སྟོན་མཐའ་མའི་རང་སྒང་ལ་ཀན་སུའུ་ཞིང་ཆེན་ཀྲེང་ཡོན་རྫོང་དུ་ཨ་ཕས་རིང་མིན་གངས་ལྗོངས་ས་མཐོར་བསྐྱོད་རྒྱུ་ཡིན་པའི་བུ་གཅིག་པུ་མུའུ་ཡུས་ཅུན་འཁྲིད་དེ་རྫོང་གྲོང་དུ་མཉམ་དུ་ཟ་མ་ཞིག་བཟས་པ་དང་ཡུད་ཙམ་ཕྱིན་རྗེས་གཞི་ནས་ཨ་ཕས“དམག་དཔུང་དུ་ཕྱིན་རྗེས་ལས་ཀ་ཧུར་ཐག་གྱིས། ཞབས་འདྲེན་མ་ཞུ་ཨང”ཞེས་པའི་བསླབ་བྱ་ཚིག་གསུམ་བརྒྱབ། བོད་དུ་སླེབས་ནས་ལོ་21སོང་རིང་ཡར་ཀླུང་གཙང་འགྲམ་གྱི་སྦྱར་པ་དུས་བཞིའི་འགྱུར་ལྡོག་གི་འགྲོས་དང་བསྟུན་ནས་སྔོན་པོ་ནས་སེར་པོ་དང་སེར་པོ་ནས་རིམ་བཞིན་སྔོན་པོར་གྱུར་བ་དང་། མུའུ་ཡུས་ཅུན་རང་ཉིད་ཀྱང་སྦྱར་པ་ཞིག་དང་འདྲ་བར་ཡར་ཀླུང་གི་ས་གཞི་ཆེ་མོའི་ཐོག་རྩ་བ་བརྟན་པོ་ཚུགས་ཡོད། ཁོང་གི་ངོས་ནས་བརྗོད་ན་ས་སེར་མཐོ་སྒང་དང་གངས་ལྗོངས་ས་མཐོའི་ཕྱོགས་མཚམས་ཀུན་རང་ཉིད་ཀྱི་མཛེས་པའི་ཁྱིམ་གཞིས་དང་ཁྱད་པར་མེད།

ཡིན་ནའང་ཚེ་མི་རྟག་རྩྭ་ཁའི་ཟིལ་པ་འདྲ་ཞེས་པ་ཅིས་མ་བདེན། 2017ལོའི་ཟླ་10ཚེས་13ཉིན་གྱི་ཐོ་རེངས་སུ་ཀླད་ཁྲག་འདྲེས་ནས་མུའུ་ཡུས་ཅུན་གྲ་ནང་རྫོང་གི་རྫོང་དཔོན་གཞོན་པའི་ལས་གནས་ཐོག་གྲོངས།

ནུབ་བྱང་ཡུལ་གྱི་སྐད་གདངས་འདྲེས་པའི་བོད་སྐད་རྒྱག་མཁན་རྒྱ་རིགས་བུ་ཕྲུག་ཁོང་དེ་ལྟར་འཇིག་རྟེན་ཕྱི་མའི་ལམ་དུ་བཞུད་པས། བོད་རིགས་ཨ་མ་ལགས་སེམས་སྡུག་གིས་མནར་ནས་མིག་ཆུ་དབང་མེད་དུ་ཤོར། དམངས་སེམས་དང་དམངས་ཀྱི་གནས་ཚུལ་རེ་རེ་བཞིན་གསལ་རྟོགས་བྱེད་མཁན་མི་བུ་ཁོང་དེ་ལྟར་འཇིག་རྟེན་ཕྱི་མའི་ལམ་དུ་བཞུད་པས། ད་དུང་བསྒྲུབས་མ་ཚར་བའི་དམངས་འཚོའི་རྣམ་གྲངས་མང་པོ་ཞིག་རང་སོར་ལུས།

མང་ཚོགས་ཀྱི་སེམས་ཀྱི་ཀ་བ་དང་མི་སེར་གྱི་སྙིང་ཉེ་ཁོང་དེ་ལྟར་འཇིག་རྟེན་ཕྱི་མའི་ལམ་དུ་བཞུད་པས། ཡུལ་མི་སྤུན་ཟླ་རྣམས་ལ་འཛད་མེད་ཀྱི་དྲན་སེམས་ཤིག་བཞག

“ང་དངོས་གནས་སྐྱིད་པོ་རེད། བྱམས་བརྩེ་ཅན་གྱི་སྐྱེད་མ་གཉིས་ཡོད”

“2000ལོའི་ཟླ་7ཚེས་19ཉིན་ནི་ངས་ཚེ་གང་བརྗེད་པར་དཀའ་བའི་ཉིན་མོ་ཞིག་སྟེ། ཉིན་དེར་ངས་ཕྲུ་གུ་མང་པོ་ཞིག་བུ་ཚབ་ལ་ཉར་བ་ཡིན”ཞེས་པ་སོགས་བསམ་གཏན་གཡུ་སྒྲོན་གྱིས་ཅ་ག་དག་པོ་བྱས་པའི་ཟིན་བྲིས་ཐོག་སྐབས་དེ་དུས་སེམས་འགུལ་ཐེབས་འོས་པའི་བྱ་བ་རྣམས་བཀོད་ཡོད། ལོ་18རིང“ཨ་མ་ལགས”ཞེས་འབོད་པས། སྐྱེས་པའི་ཕ་མ་མིན་ཡང་བསྐོས་པའི་ཕ་མ་ཡིན་སྟབས་བརྩེ་དུང་མི་སླེབས་ཅི་ལ་སྲིད།

སྐབས་དེ་དུས་བསམ་གཏན་གཡུ་སྒྲོན་ནི་འཕྱོངས་རྒྱས་རྫོང་ཕྱུགས་རིགས་སྨན་པའི་ས་ཚིགས་ཀྱི་ཕྱུགས་རིགས་སྨན་པ་ཞིག་ཡིན་པ་དང་མུའུ་ཡུས་ཅུན་ནི་དྲག་ཆས་ཉེན་རྟོག་རུ་འབྲིང་གི་གཉེར་པ་རེད། ཉིན་ཞིག་རུ་འབྲིང་གི་ཕག་པས་ལྟོ་མ་བཟས་སྟབས་མུའུ་ཡུས་ཅུན་གྱིས་ཕྱུགས་རིགས་སྨན་པའི་ས་ཚིགས་ལ་སྨན་བཅོས་གནང་རོགས་ཞུས། འཕྲད་མ་ཐག་ནས་བསམ་གཏན་གཡུ་སྒྲོན་དང་གཤིས་ཀ་འཇམ་ལ་སྤྲོ་སེམས་ཆེ་ཞིང་ད་དུང་བོད་སྐད་ཚིག་རེ་གཉིས་ཤེས་པའི་གཞོན་པ་དེ་ཧ་ཅང་འཆམ་པོ་ཆགས།

བསམ་གཏན་གཡུ་སྒྲོན་གྱི་ཕྲུ་གུ་ཕྱིར་སློབ་གྲྭ་དང་ལས་ཀར་བསྐྱོད་ནས་ཁྱིམ་དུ་རོགས་པ་མེད་པ་ཤེས་རྗེས། མུའུ་ཡུས་ཅུན་དང་འཐབ་གྲོགས་ཚོས་ཁོམ་པ་ཡོད་རིམ་བཞིན་ཁོང་ལ་ནང་ལས་བྱེད་རོགས་བྱེད་ཀྱི་ཡོད།

བསམ་གཏན་གཡུ་སྒྲོན་དང་སྐད་ཆ་མང་པོ་ཤོད་རེས་ （པར་ངོས་གཉིས་པར་གཟིགས）