འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར། ཟངས་རི་རྫོང་གིས་འོལ་ཁ་ཆུ་ཚན་མཛེས་ལྗོངས་ཁུལ་གྱི་རྣམ་གྲངས་ཕྱོགས་ཡོངས་ནས་ལས་འགོ་ཚུགས་པ་དང་གཅིག་སྡུད་བཤིག་སྤོ་བྱེད་པའི་མཛད་སྒོ་འཚོགས་ཤིང་། ཁྱོན་བསྡོམས་མ་དངུལ་སྒོར་དུང་ཕྱུར་1.8ལྷག་ཙམ་བཏང་བའི་གཙོ་གནད་རྣམ་གྲངས་4དུས་གཅིག་ཏུ་ལག་ལེན་བསྟར་འགོ་ཚུགས་པ་དེ་ཐོག་ནས་རྫོང་ཡོངས་ཀྱི་ས་ཁོངས་ཧྲིལ་པོའི་ཡུལ་སྐོར་འཕེལ་རྒྱས་དེ་སྤུས་འབྲས་ལེགས་གཉེར་གྱི་དུས་མཚམས་གསར་པར་སླེབས་པ་མཚོན་ཡོད།

ཤེས་རྟོགས་བྱུང་བར་གཞིགས་ན། ད་ཐེངས་དུས་གཅིག་ཏུ་ལག་ལེན་བསྟར་འགོ་ཚུགས་པའི་གཙོ་གནད་རྣམ་གྲངས་4ཡི་ནང་། ཡུལ་སྐོར་གྱི་སྤྱི་པའི་ཞབས་ཞུའི་ལྷན་སྦྱར་སྒྲིག་བཀོད་དང་། འགྲོ་ལམ་གྱི་རྨང་གཞིའི་སྒྲིག་བཀོད་སྤུས་ཚད་མཐོར་གཏོང་། མིའི་འཚོ་སྡོད་ཁོར་ཡུག་ལེགས་གཏོང་། རིག་གནས་ཡུལ་སྐོར་མཉམ་འདྲེས་རིམ་སྤོར་སོགས་ཀྱི་ཁྱབ་ཁོངས་ཚུད་ཡོད། དེའི་ནང་ཧུའུ་ནན་གཡོད་དབྱང་གིས་མ་དངུལ་སྒོར་ཁྲི་3000བཏང་ནས་རོགས་སྐྲུན་བྱས་པའི་ཡུལ་སྐོར་སྤྱི་པའི་ཞབས་ཞུའི་སྒྲིག་བཀོད་འཛུགས་སྐྲུན་རྣམ་གྲངས（དུས་ཐེངས་དང་པོ）ཀྱིས་སྨི་ངོས་གྲུ་4000ལྷག་ཙམ་ཡོད་པའི་སྤྱི་པའི་ཞབས་ཞུའི་ལྟེ་གནས་ཤིག་བསྐྲུན་ནས་ཡུལ་སྐོར་བར“གཅིག་འཐུས་རྣམ་པའི”སྤུས་ཚད་མཐོ་བའི་ཞབས་ཞུ་མཁོ་འདོན་དང་། S507མཁར་སྣ་གྲོང་ཚོ་ནས་ཚོད་པ་གྲོང་ཚོ་བར་གྱི་སྤུས་ཚད་ལེགས་གཏོང་སྒྱུར་བཀོད་ལས་གྲྭས་སྤྱི་ལེ་4.3ཡོད་པའི་ཞིང་ཆེན་ལམ་དེ་རིམ་མཐོའི་ཡུལ་སྐོར་གཞུང་ལམ་དུ་རིམ་སྤོར་བྱས་ཏེ་མཛེས་ལྗོངས་ཁུལ་དང་ཕྱི་ཕྱོགས་འབྲེལ་མཐུད་བྱེད་པའི་ལམ་བུ་ཤར་གཏོང་། ཞོལ་པ་གྲོང་ཚོའི་ཡུལ་སྐོར་རིམ་སྤོར་འཛུགས་སྐྲུན་རྣམ་གྲངས་ཀྱིས་ཡུལ་མིའི་སྡོད་ཁང་དུད་ཚང་83གྱི་སྔར་ཡོད་སྡོད་ཁང་བསྐྱར་སྐྲུན་དང་སྒྱུར་བཀོད་བྱས་ནས“ཡུལ་མིའི་སྡོད་ཁང་དམངས་སྲོལ་གནས་ཚང་དུ་སྒྱུར་བ་དང་ཞིང་པའི་སྡོད་ཁང་མགྲོན་ཁང་དུ་བསྒྱུར”ཏེ་མང་ཚོགས་ཚོས་ཁྱིམ་གྱི་སྒོ་རྩར་ཡུལ་སྐོར་ཡོང་འབབ་གསོག་ཐུབ་པ་བཅས་བྱ་རྒྱུ་རེད།

ཤེས་རྟོགས་བྱུང་བར་གཞིགས་ན། ཉེ་བའི་ལོ་ཤས་རིང་། འོལ་ཁ་ཆུ་ཚན་མཛེས་ལྗོངས་ཁུལ་སྔ་རྗེས་སུ་རང་སྐྱོང་ལྗོངས་རིམ་པའི་ཡུལ་སྐོར་སྤྲོ་གསེང་ཁུལ་དང་། 3Aརིམ་པའི་ཡུལ་སྐོར་མཛེས་ལྗོངས་ཁུལ། རང་སྐྱོང་ལྗོངས་རིམ་པའི་ལུས་གསོའི་ཡུལ་སྐོར་རྟེན་གཞི་བཅས་སུ་གྲུབ་འབྲས་ཐོབ་པའི་ངང་འཛུགས་གཏོད་བྱས་ཏེ། སྐྱེ་ཁམས་དམིགས་བསལ་དང་། རིག་གནས་ཡུལ་སྐོར་མཉམ་འདྲེས། དམངས་ཕན་དམངས་ཕྱུག་བཅས་ཀྱི་ཁྱད་ལྡན་འཕེལ་རྒྱས་ཀྱི་ལམ་བུའི་ཐོག་བསྐྱོད་ཡོད།