སྣེ་གདོང་ཆུས་སྐྱེད་པ་ཤང་རྒྱལ་བཟང་གྲོང་ཚོ་ནི་འོན་ལུང་གཞུང་དུ་གནས་ཤིང་། “ང་ཚོའི་གྲོང་ཚོ་ལུང་ཁུག་ཆུང་ཆུང་ཞིག་ཡིན་རུང་། གཞན་གྱི་རྗེས་སུ་ལུས་འདོད་གཏན་ནས་མེད”ཅེས་བསྟན་འཛིན་པད་མས་བློ་སྤོབས་ཀྱིས་ཁེངས་བཞིན་བཤད།
རྗེས་སུ་ལུས་འདོད་གཏན་ནས་མེད་པའི་བསམ་བློ་དེ་ཉིད་སྒྱུར་བཅོས་སྒོ་དབྱེའི་ཐོག་མའི་དུས་ནས་མངོན་ཡོད། གྲོང་ཚོའི་ལོ་བདུན་ཅུ་ལ་སླེབས་པའི་བགྲེས་སོང་པ་སངས་ཀྱིས“སྐབས་དེ་དུས་ཚང་མས་གྲོང་ཚོའི་ནང་དངོས་པོའི་ཐོན་སྐྱེད་ཡོད་པ་ཙམ་གྱིས་མི་ཆོག་པར། བསམ་པའི་རིག་གནས་འཚོ་བའང་ཡོད་དགོས་པའི་ངོས་འཛིན་བྱེད་ཀྱི་ཡོད”ཅེས་བརྗོད། དེར་བརྟེན་གྲོང་ཚོས་བློ་ཁོག་ཆེན་པོའི་ངང་ཐག་གཅོད་ཅིག་བྱས་པ་སྟེ། འབྲི་གཡག་8བཙོངས་ཏེ་ལྷ་ས་ནས་ལྷ་མོའི་འཁྲབ་ཆས་ཆ་ཚང་ཞིག་ཉོས་པ་མ་ཟད། གཞོན་ནུ་རྣམས་ལྷ་མོ་སྦྱོང་བར་བཏང་བ་རེད།
དུས་རབས་ཕྱེད་ཀ་ཙམ་སོང་རྗེས། ཐོག་མའི་ས་བོན་དེ་ལྗོན་ཤིང་ཞིག་ཏུ་གྱུར། རྒྱལ་བཟང་གྲོང་ཚོའི་འབག་སྔོན་ལྷ་མོ་རིག་རྩལ་འཁྲབ་སྟོན་རུ་ཁག་ལ་ད་ཆ་འཁྲབ་སྟོན་པ་26ཡོད་ཅིང་། 《པད་མ་འོད་འབར》དང་། 《གཟུགས་ཀྱི་ཉི་མ》 《འགྲོ་བ་བཟང་མོ》སོགས་ལྷ་མོའི་འཁྲབ་གཞུང་ཆེན་པོ་བརྒྱད་ལ་བྱང་ཆུབ་ཡོད། ཁོང་ཚོས་བྱེད་སྒོ་མང་པོའི་ནང་རྒྱ་ཆེའི་ཡུལ་སྐོར་བར་འཁྲབ་སྟོན་བྱས་པའི་ཁར། ད་དུང་ཁོང་ཚོ་ནི་ལྷོ་ཁ་གྲོང་ཁྱེར་གྱི་རིག་གནས་དང་ཡུལ་སྐོར་གྱི་ཐོན་ལས་དྲིལ་བསྒྲགས་བྱེད་པའི་མིང་བྱང་ཁྱད་འཕགས་ཅན་ཞིག་ཏུའང་གྱུར་ཡོད།
དེར་བརྟེན། རྒྱལ་བཟང་གྲོང་ཚོས་ཉེ་བའི་ལོ་ཤས་རིང་རིག་གནས་དང་ཡུལ་སྐོར་གྱི་རིགས་གཅིག་མཁས་ཅན་དང་མཉམ་དུ་ས་ཡུལ་དངོས་སུ་བརྟག་ཞིབ་ཐེངས་མང་བྱས་ཏེ། རྐང་ཐང་ཡུལ་སྐོར་དར་ཁྱབ་ཆེ་བའི་དེང་གི་དུས་འདིར། གྲོང་མི་ཚོས་སོ་ནམ་བྱེད་པ་དང་གཞན་ཡུལ་དུ་གླ་པ་རྒྱུག་པ་ཕུད་ཡུལ་སྐོར་གྱི་ཡོང་འབབ་གསོག་ཐུབ་པར་བྱ་རྒྱུའི་རེ་བའང་བྱེད་ཀྱི་ཡོད་པ་རེད།
ཞོལ་གྲོང་ཚོས་གནའ་བོའི་ངག་རྒྱུན་དང་དེང་རབས་ཀྱི་ཡུལ་སྐོར་ཟུང་འབྲེལ་གང་ལེགས་བྱས་ཏེ། རི་སྟེང་དུ་ཡུལ་ལྗོངས་ལ་ལྟ་བའི་རྒྱང་ཤེལ་བསྒར་ཡོད་པ་དང་། ཡུལ་སྐོར་བས་གནས་དེར་ཡར་ལྷ་ཤམ་པོར་རྒྱང་ལྟ་བྱེད་ཐུབ་ལ་ལྷོ་ཁ་གྲོང་ཁུལ་གྱི་ཡུལ་ལྗོངས་ཧྲིལ་པོར་ཡང་ལྟ་ཆོག་གི་ཡོད། ལོ་རེ་བཞིན་གཉེར་བའི་རྡོ་སྒོར་རྒྱག་པའི་འགྲན་བསྡུར་དང་རྟ་རྩལ་འཁྲབ་སྟོན་སོགས་ཀྱི་བྱེད་སྒོ་ལས་ཡུལ་སྐོར་བ་མང་པོའི་ཡིད་དབང་བཀུག
ཞོལ་གྲོང་ཚོའི་འོང་སྐོར་དུས་ཆེན་ལ་ཀུན་གྱི་དོ་ཁུར་ཆེན་པོ་ཐོབ་ཅིང་། དེར་རྒྱལ་སྲིད་སྤྱི་ཁྱབ་ཁང་དང་དེ་བཞིན་རིག་གནས་དང་ཡུལ་སྐོར་པུས་བསྩལ་བའི“རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་མིང་གཞུང”གི་ཁས་ལེན་དཔང་འདོན་ཐོབ་ཡོད། ཡུལ་སྐོར་བའི་ཡུལ་སྐོར་གྱི་མྱོང་ཚོར་སྔར་བས་ལེགས་སུ་གཏོང་ཆེད། གྲོང་ཚོ་དེས་ད་དུང་གྲ་ནང་རྫོང་གི་ཆེད་ལས་རྟ་རྩལ་ཚོགས་པ་གདན་དྲངས་ནས་གྲོང་མིར་འཁྲབ་སྟོན་བྱེད་སྟངས་བསླབས་པས། གནའ་བོའི་སྲོལ་རྒྱུན་འགྲན་བསྡུར་ལ་སླར་ཡང་སྐྱེ་སྟོབས་ཀྱི་གཟི་དཔལ་རྒྱས་པ་རེད།
རྒྱལ་བཟང་གྲོང་ཚོའི་ལྷ་མོ་ཟློས་གར་ནས་ཞོལ་གྲོང་ཚོའི་འོང་སྐོར་དུས་ཆེན་དང་། དེ་ནས་ཚོགས་རྒྱལ་གྲོང་ཚོའི་སླས་འཐག་གི་ཐོན་རྫས་སྐོར་དྲ་ལམ་ནས་ཐད་གཏོང་བྱེད་པའི་བར། ལྷོ་ཁའི་སྲོལ་རྒྱུན་གྲོང་ཚོས་རང་རང་གི་བྱེད་སྟངས་ཐོག་ནས་རིག་གནས་ལ་བརྟེན་ནས་ཡུལ་སྐོར་སྐྱོང་སྤེལ་དང་ཡུལ་སྐོར་ལ་བརྟེན་ནས་རིག་གནས་མངོན་པའི་ནང་དོན་ཟབ་མོར་གསལ་འགྲེལ་བྱེད་བཞིན་ཡོད་པ་རེད།
ནུབ་ཁའི་ཉི་མ་བཞུད་སྐབས། རྒྱལ་བཟང་གྲོང་ཚོའི་ནང་ལྷ་མོ་འཁྲབ་སྦྱོང་གི་སྐད་སྒྲ་ཡང་བསྐྱར་མཆེད་ཅིང་། གནའ་བོའི་སྐད་ངག་གི་འགྱུར་ཁུག་དེ་འོན་ལུང་གཞུང་དུ་ཡང་ཡང་གྲགས། ད་ཆ་ཕུ་མ་གཡུ་མཚོ་དང་། གུ་རུ་བླ་མཚོ། སྐུ་ལྷ་མཁའ་རི། པད་མ་གླིང་མཚོ་སོགས་ལྷོ་ཁའི་མཛེས་ལྗོངས་ཁུལ་མང་པོ་རིམ་བཞིན་སྐད་གྲགས་ཆོད་ནས་རྒྱུན་འཛིན་དང་གསར་གཏོད་ཁྲོད་རིག་གནས་ཀྱི་རོལ་དབྱངས་དཀྲོལ་བཞིན་ཡོད་པ་དང་། ལྷོ་ཁའི་རིག་གནས་དང་ཡུལ་སྐོར་བྱ་གཞག་དེ་ཉིད་རི་ཚོགས་བརྒལ་ནས་སྔར་ལས་རྒྱང་ཐག་རིང་བའི་ཡུལ་ལུང་དུ་དར་རྒྱས་འགྲོ་བཞིན་མཆིས།
（བོད་ལྗོངས་ཉིན་རེའི་ཚཊ་པར་ནད་བཏུས）
