འདི་ག་ཚགས་པར་ཁང་དུ་གནས་ཚུལ་འབྱོར་གསལ།ཉེ་ཆར། གྲོང་ཨུད་ཀྱི་ཧྲུའུ་ཅི་ལི་ཧྥུའུ་ཀྲུང་གིས་གྲོང་ཁྱེར་མི་དམངས་ཡིག་བསྐུར་ངོ་བཅར་སྣེ་ལེན་ཁང་དུ་ཕེབས་ནས་འགོ་ཁྲིད་ལས་བྱེད་པས་ངོ་བཅར་སྣེ་ལེན་གྱི་འགན་འཁྲིའི་ལམ་ལུགས་དོན་འཁྱོལ་བྱེད་པར་སྣེ་ཁྲིད་གནང་བ་དང་། ས་གནས་ས་ཐོག་ཏུ་ངོ་བཅར་ལ་ཕེབས་པའི་མང་ཚོགས་ལ་སྣེ་ལེན་ཞུས་གནང་སྟེ་མི་དམངས་ཀྱི་ཡིག་བསྐུར་ངོ་བཅར་ལས་དོན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་སློབ་སྦྱོང་ལག་བསྟར་མཐར་ཕྱིན་བྱེད་དགོས་པ་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱེད་དགོས་པ། དུས་རབས་གསར་པའི་ཏང་གི་མང་ཚོགས་ལམ་ཕྱོགས་དང་“ཧྥེང་ཆའོ་ཡི་ཉམས་མྱོང”ལག་ལེན་ནན་ཏན་བསྟར་བ། སེམས་ནུས་ཡོད་རྒུས་ཡིག་བསྐུར་ངོ་བཅར་ལས་དོན་ཡག་པོ་སྒྲུབ་པ། མང་ཚོགས་ཀྱི་ལུགས་མཐུན་རེ་ཞུ་ཁྲིམས་སྲོལ་ལྟར་ཐག་གཅོད་བཅས་བྱས་ཏེ་མང་ཚོགས་ཀྱི་བདེ་རྩར་ཐུག་པའི་ཁེ་ཕན་སྲུང་སྐྱོང་ཏན་ཏིག་བྱེད་དགོས་པའི་ནན་བཤད་གནང་བ་རེད།
ངོ་བཅར་སྣེ་ལེན་གནང་རིང་། ལི་ཧྥུའུ་ཀྲུང་གིས་ངང་རྒྱུད་རིང་པོས་ངོ་བཅར་དུ་ཡོང་མཁན་མང་ཚོགས་ཁག་གཉིས་ཀྱི་རེ་ཞུ་གསན་པ་དང་། གནས་ཚུལ་ཤེས་རྟོགས་ཞིབ་ཕྲ་གནང་རྗེས་ （པར་ངོས་གཉིས་པར་གཟིགས） （པར་ངོས་དང་པོར་མཐུད） གནད་དོན་ཐོན་ས་འདྲི་རྩད་དང་ཐག་གཅོད་བྱེད་ཐབས་ལ་ཞིབ་འཇུག། ཞིབ་ཕྲའི་བསམ་འཆར་འདོན་པ། མང་ཚོགས་ཀྱི་དོ་ཁུར་ལ་ལན་འདེབས་པ་བཅས་གནང་རྗེས། མང་ཚོགས་ཀྱིས་བཏོན་པའི་གནད་དོན་ཁག་དུས་ཐོག་ཏུ་ཐག་གཅོད་ཡག་པོ་བྱེད་དགོས་པ་དང་། བཅའ་ཁྲིམས་དང་སྒྲིག་སྲོལ་ལྟར་དུས་བཀག་ནང་ཐག་གཅོད་ཐུབ་པ། མི་སྤྱོད་ཚན་པས་ངལ་རྩོལ་གན་རྒྱ་ལག་བསྟར་ནན་པོ་བྱ་རྒྱུར་སྐུལ་འདེད་བཏང་ནས་མང་ཚོགས་ཀྱི་ཁྲིམས་མཐུན་ཁེ་དབང་སྲུང་སྐྱོང་ཡག་པོ་བཅས་བྱེད་དགོས་པའི་བཀའ་སློབ་གནང་བར་ངོ་བཅར་དུ་ཡོང་བའི་མང་ཚོགས་ཀྱིས་གནད་དོན་ཐག་གཅོད་བྱས་ཚུལ་ལ་བློ་མགུ་པོ་བྱུང་ནས། ཏང་ཨུད་དང་སྲིད་གཞུང་གིས་ཐུགས་ཁུར་དང་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད།
ལི་ཧྥུའུ་ཀྲུང་གིས་ངེད་གྲོང་ཁྱེར་གྱི་ཡིག་བསྐུར་ངོ་བཅར་ལས་དོན་ལ་གདེང་འཇོག་གང་ལེགས་གནང་བ་དང་ཆབས་ཅིག་ཁོང་གིས་ཡིག་བསྐུར་ངོ་བཅར་ལས་དོན་ནི་མང་ཚོགས་ཀྱི་སྒོ་རྩར་བསྐྱལ་བའི་ལས་དོན་ཞིག་དང་སྤྱི་ཚུལ་དམངས་འདུན་ཤེས་རྟོགས་བྱེད་པའི་ལས་དོན་གལ་ཆེན་ཞིག་ཡིན་པས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་དང་སྤྱི་ཚོགས་ཞི་མཐུན་བརྟན་ལྷིང་དང་འབྲེལ་བ་ཡོད། གྲོང་ཁྱེར་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་དམིགས་ཡུལ་གྱི་འདུ་ཤེས་སྔར་བས་ཟབ་ཏུ་བཏང་ནས་རང་སྡོད་སར་མི་བཞག་ནས་བསམ་ཤེས་བྱེད་དགོས་པ་དང་། མང་ཚོགས་ཀྱི་བདེ་སྡུག་གང་ཡིན་ཉན་པ་དང་དེར་སེམས་ཁུར་བྱས་ནས་ལྷག་བསམ་དག་པོས་མང་ཚོགས་ཀྱི་བྲེལ་དཀའ་སྡུག་སྨོན་གྱི་གནད་དོན་ཁག་ཐག་གཅོད་གང་ལེགས་བྱེད་དགོས་པའི་བཀའ་སློབ་གནང་།
ལི་ཧྥུའུ་ཀྲུང་གིས། མང་ཚོགས་ཉེ་འགྲམ་གྱི་དོན་ཆུང་མཐའ་དག་ཏང་ཨུད་དང་སྲིད་གཞུང་གི་དོན་ཆེན་ལ་བརྩི་དགོས་པ་དང་། ལས་ཀའི་གཙོ་གནད་མངོན་གསལ་དོད་པོ་ཡོང་བ། གཙོ་གནད་དུས་མཚམས་ཁོང་དུ་ཆུད་པ། གཙོ་གནད་ཁྱབ་ཁོངས་ལ་དམ་པོར་དམིགས་པ། གནས་ཚུལ་གང་ཡིན་ཁོང་དུ་ཆུད་པ་བཅས་བྱས་ཏེ་མང་ཚོགས་ཀྱི་ལས་དོན་ཁག་ཞིབ་ཚགས་པོ་དང་ཏན་ཏིག་ངང་བསྒྲུབས་ཐོག་མིག་མཐོང་ལག་ཟིན་གྱི་ལས་ཀའི་ཕན་འབྲས་ལ་བརྟེན་ནས་དམངས་ཀྱི་ཡིད་ཆེས་ཐོབ་པ་བྱེད་དགོས། སྔོན་ཚུད་ནས་ཇུས་འགོད་དང་བཀོད་སྒྲིག་བྱེད་དགོས་པ་དང་། སྔོན་ཚུད་ནས་ཉེན་བརྡ་དང་དབྱེ་ཞིབ་བརྡར་གཅོད་བྱས་ཏེ་ཐབས་མང་མཉམ་སྤྱོད་དང་ཕྱོགས་བསྡུས་ཇུས་འདོན་གྱིས་འགལ་ཟླ་དང་རྩོད་གཞི་རྣམས་སྔ་ཙམ་ཤེས་རྟོགས་དང་། སྔ་ཙམ་ནས་སྔོན་འགོག ཐོན་མ་ཐག་ཐག་གཅོད་བཅས་བྱེད་དགོས། ཁྲིམས་སྐྱོང་ཅན་འཛུགས་སྐྱོང་ལ་ཤུགས་སྣོན་བརྒྱབ་ནས་《ཡིག་བསྐུར་ངོ་བཅར་ལས་དོན་སྲོལ་ཡིག》སློབ་སྦྱོང་ལག་བསྟར་ནན་ཏན་གྱིས་ཁྲིམས་སྐྱོང་བསམ་གཞི་དང་ཁྲིམས་སྐྱོང་བྱེད་ཐབས་བརྒྱུད་གནད་དོན་ཐག་གཅོད་བྱེད་པའི་འཇོན་ཐང་རྒྱུན་ཆད་མེད་པར་ཆེ་རུ་གཏོང་དགོས་པའི་བླང་བྱ་བཏོན་གནང་བ་རེད།
ལི་ཧྥུའུ་ཀྲུང་གིས། ཏང་གིས་ཡིག་བསྐུར་ངོ་བཅར་ལས་དོན་ལ་འགོ་ཁྲིད་བྱ་རྒྱུ་མཐའ་འཁྱོངས་བྱས་ཏེ་རིམ་ཁག་སྡེ་ཚན་ཁག་གིས་ཡིག་བསྐུར་ངོ་བཅར་ལས་དོན་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་དམ་འཛིན་བྱེད་དགོས་པ་དང་། ཕྱོགས་ཁག་གི་འགན་འཁྲི་ནན་དུ་གཏོང་བ། འགོ་ཁྲིད་ཀྱིས་དུས་བཀག་ནང་ཡིག་བསྐུར་ངོ་བཅར་སྣེ་ལེན་དང་། གཤམ་སྐྱོད་ངོ་བཅར། གྱོད་གཞི་འགན་གཙང་ལེན་པ་བཅས་ཀྱི་ལམ་ལུགས་དོན་འཁྱོལ་གྱིས་མང་ཚོགས་ཀྱི་ལས་དོན་སྒྲུབ་པའི་འཇོན་ཐང་ཆེ་རུ་གཏོང་དགོས། བརྩེ་སེམས་དང་། འགན་འཁྲི། ལྷག་བསམ་བཅས་ཀྱི་ཐོག་ནས་ཡིག་བསྐུར་ངོ་བཅར་ལས་དོན་ཡག་པོ་བསྒྲུབ་ཐོག་ཡིག་བསྐུར་ངོ་བཅར་ལམ་ལུགས་ཀྱི་དགེ་མཚན་དེ་སྤྱི་ཚོགས་བཅོས་སྐྱོང་གི་ཕན་འབྲས་སུ་བསྒྱུར་ནས་སྤྱི་ཚོགས་ཁྱོན་ཡོངས་ཀྱི་ཞི་མཐུན་བརྟན་ལྷིང་ལ་སྲུང་སྐྱོང་བྱས་ཏེ། ཕུལ་བྱུང་གི་གྲུབ་འབྲས་བརྒྱུད་རང་སྐྱོང་ལྗོངས་དབུ་བརྙེས་ནས་ལོ་60འཁོར་བར་བསུ་བ་ཞུ་དགོས་པའི་ནན་བཤད་གནང་བ་རེད།
གྲོང་ཁྱེར་དབུ་ཁྲིད་བཀྲ་ཤིས་ཕུན་ཚོགས་དང་ཉིའུ་ཁུན་རྟོག་ཞིབ་ནང་ལྷན་དུ་ཞུགས་ཡོད་པ་རེད།། ནོར་བུ་ཚང་ལྡན་གྱིས་བསྒྱུར། བསོད་ནམས་བསྟན་པས་ཞུས།
