འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ལམ། 2024ལོའི་གྲོང་ཁྱེར་ཡོངས་ཀྱི་དུག་འགོག་ལས་དོན་ཚོགས་འདུ་འཚོཊ་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུག་འགོག་ལས་དོན་ཐད་གནང་བའི་མཛུབ་སྟོན་དང་མཆན་འགོད་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། 2024ལོའི་གྲོང་ཁྱེར་ཡོངས་ཀྱི་དུག་འགོག་ལས་དོན་སྤེལ་ཚུལ་བརྡ་ཁྱབ་བཏང་བ། གོམ་སྟབས་རྗེས་མའི་གྲོང་ཁྱེར་ཡོངས་ཀྱི་དུག་འགོག་ལས་དོན་ལ་བཀོད་སྒྲིག་བཅས་བྱས་པ་རེད།
གྲོང་ཨུད་རྒྱུན་ཨུ། སྲིད་ཁྲིམས་ཨུ་ལྷན་གྱི་ཧྲུའུ་ཅི། གྲོང་ཁྱེར་སྤྱི་བདེ་ཅུས་ཏང་ཨུད་ཀྱི་ཧྲུའུ་ཅི། དུག་འགོག་ཨུ་ལྷན་གྱི་ཀྲུའུ་རེན་བཅས་ཡིན་པའི་བཀྲ་ཤིས་ཕུན་ཚོགས་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་དང་། གྲོང་སྤྱི་གཞོན་པ། གྲོང་ཁྱེར་སྤྱི་བདེ་ཅུས་ཀྱི་ཅུས་ཀྲང་། དུག་འགོག་ཨུ་ལྷན་གྱི་རྒྱུན་ལས་ཀྲུའུ་རེན་གཞོན་པ་བཅས་ཡིན་པའི་ལིའུ་ཙོང་ཁྲང་གིས་གཙོ་སྐྱོང་གནང་།
བཀྲ་ཤིས་ཕུན་ཚོགས་ཀྱིས་ནན་བཤད་གནང་དོན། ཆབ་སྲིད་ཀྱི་རྨང་གཞི་བརྟན་དུ་གཏོང་བ་དང་། ཡང་དག་པའི་དུག་འགོག་བསམ་ཕྱོགས་བཙུགས་ཏེ་དུག་འགོག་གི་གཙོ་གཟུགས་ལས་དོན་དང་སྤྱི་ཚོགས་འཕེལ་རྒྱས་ཀྱི་ལས་དོན་གཞན་དག་དབར་གྱི་འབྲེལ་བ་ཐག་གཅོད་ཡག་པོ་བྱས་ནས་དམིགས་སའི་རང་བཞིན་དང་ཁྱད་པར་རང་བཞིན་གྱི་བཅོས་སྐྱོང་བྱ་ཐབས་སྤྱད་དེ་དུག་འགོག་གི་བསམ་བློའི་ངོས་འཛིན་མཐོ་རུ་གཏོང་བའི་ལས་དོན་ཕྱོགས་ཡོངས་ནས་ཡག་པོ་སྒྲུབ་དགོས། མངོན་གསལ་དོད་པའི་གནད་དོན་ལ་དམ་པོར་དམིགས་ཏེ་རྡུང་རྡེག་བཅོས་སྒྲིག་ལ་ཤུགས་སྣོན་རྒྱག་པ་དང་། དུག་རྫས་སྔོན་འགོག་གི་སློབ་གསོར་དམ་འཛིན་ཡག་པོ་བྱེད་པ། དུག་འགོག་གི“འགག་སྒྲོལ་དམག་འཐབ”ཕྱོགས་ཡོངས་ནས་ཡག་པོ་རྒྱག་པ། དུག་འབྲེལ་གྱི་ཁྲིམས་འགལ་ཉེས་གསོག་བྱེད་སྤྱོད་སྣ་ཚོགས་ལ་རྡུང་རྡེག་ནན་པོ་གཏོང་བ་བཅས་བྱས་ནས་བདེ་འཇགས་དང་བརྟན་ལྷིང་གི་སྤྱི་ཚོགས་ཁོར་ཡུག་ནུས་ཤུགས་ཡོད་རྒུས་གཏོད་དགོས། ལས་ཀའི་འགན་འཁྲི་ཏན་ཏིག་འཁུར་ནས་དུག་འགོག་ཨུ་ལྷན་གྱི་ཁོངས་གཏོགས་ཚན་པ་དང་སྤྱི་ཚོགས་སྤྱི་དམངས་ཀྱི་སྟོབས་ཤུགས་འདོན་སྤེལ་གང་ལེགས་བྱས་ཏེ་དུག་འགོག་དཔུང་ཁག་ཆེད་འཛུགས་སྟོབས་ཆེར་གཏོང་བ་དང་། ཕྱོགས་བསྡུས་ཇུས་བསྟར་མཐའ་འཁྱོངས་བྱེད་པ། དུག་འགོག་ལས་དོན་གྱི་མཐུན་སྦྱོར་མཉམ་བཅོས་གཏིང་ཟབ་ཏུ་གཏོང་བ། མཉམ་དུ་དུག་འགོག་ལས་དོན་མཐུན་སྦྱོར་ཅན་དང་། ཁྲིམས་སྐྱོང་ཅན། བློ་གྲོས་ཅན། སྤྱི་ཚོགས་ཅན་བཅས་ལ་སྐུལ་འདེད་གཏོང་བ་བཅས་བྱས་ཏེ་མཉམ་སྐྲུན་དང་། མཉམ་བཅོས། མཉམ་སྤྱོད་བཅས་ཀྱི་དུག་འགོག་ལས་དོན་གྱི་རྣམ་པ་ཞིག་ཆགས་པ་བྱས་ཐོག། དུག་འགོག་ལས་དོན་འགན་ལེན་དོ་དམ་གྱི་“བསྐོར་རྡུང་དམག་འཐབ”ཕྱོགས་ཡོངས་ནས་ཡག་པོ་རྒྱག་དགོས་སོ།
ཚོགས་འདུ་དེ་བརྙན་འཕྲིན་ཁ་པར་རྣམ་པའི་ཐོག་ནས་འཚོགས་པ་རེད།།བསོད་བསྟན་གྱིས་བསྒྱུར། བསོད་ཡེ་བདེས་ཞུས།
