མི་དམངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། 2021ལོའི་ལོ་སྟོད་ཀྱི་དམག་མི་བསྡུ་བའི་ལས་དོན་ཟླ་2ཚེས་20ཉིན་ནས་འགོ་འཛུགས་རྒྱུ་དང་ཟླ་3ཚེས་31ཉིན་མཇུག་སྒྲིལ་རྒྱུ་རེད། ལོ་སྨད་ཀྱི་དམག་མི་བསྡུ་བའི་ལས་དོན་ཟླ་8ཚེས་15ཉིན་ནས་འགོ་འཛུགས་རྒྱུ་དང་ཟླ་9ཚེས་30ཉིན་མཇུག་སྒྲིལ་རྒྱུ་རེད། དམག་མིའི་ནང་གཙོ་གནད་ཐོག་སློབ་ཆེན་སློབ་མ་བསྡུས་ཏེ། རིམ་པ་ཁག་དང་རིགས་ཁག་གི་སློབ་གྲྭའི་སློབ་ཐོན་སློབ་མ་བསྡུ་རྒྱུ་མངོན་གསལ་དོད་པོ་ཡོང་བ་དང་། རང་བྱུང་དང་བཟོ་སྐྲུན་རིག་པའི་སློབ་ཆེན་སློབ་མ་དང་དམག་གྲབས་དམག་རྒྱག་ལ་མཁོ་བའི་རྩལ་ནུས་ཤེས་ལྡན་མི་སྣ་དམག་དཔུང་ནང་བསྡུ་རྒྱུར་སྔོན་ལ་ཆོག་མཆན་སྤྲོད་རྒྱུ་རེད། ཐད་གཏོགས་གྲོང་ཁྱེར་དང་། ཞིང་ཆེན་གྱི་ལྟེ་བའི་གྲོང་ཁྱེར། མཐོ་སློབ་གཅིག་སྡུད་ས་ཁུལ་བཅས་ནས་མཐོ་རིམ་སློབ་འབྲིང་ཐོན་པ་ཡན་གྱི་རིག་གནས་ཆུ་ཚད་ལྡན་པའི་གཞོན་ནུ་བསྡུ་རྒྱུ་དང་། ས་ཁུལ་གཞན་དུ་དམའ་རིམ་སློབ་འབྲིང་ཐོན་པའི་སློབ་མ་བསྡུ་རྒྱུ་ཉུང་དུ་གཏོང་བའམ་ཡང་ན་རིམ་བཞིན་བསྡུ་རྒྱུ་མིན་པ་རེད། དེ་དང་དུས་མཚུངས་མཐོ་རིམ་སློབ་གྲྭ་དཀྱུས་མར་ཚུད་པ་དང་དེ་བཞིན་མཐོ་རིམ་སློབ་གྲྭ་འགྲིམ་བཞིན་པའི་སློབ་མ་དང་། རྒྱལ་ཁབ་ཀྱི་ཁས་ལེན་ཐོབ་པའི་མཐོ་རིམ་ཡན་གྱི་ལས་རིགས་རྩལ་ནུས་རིམ་པའི་ལག་ཁྱེར(ལས་རིགས་ཐོབ་ཐང་ལག་ཁྱེར)ཡོད་པའི་ལས་རིགས་སློབ་གྲྭའི(ལག་རྩལ་བཟོ་པའི་སློབ་གླིང་ཚུད་པ)སློབ་ཐོན་སློབ་མ། ལས་ཁུངས་དང་། ཚོགས་པ། ཁེ་ལས་དང་བྱ་གཞག་ཚན་པ་བཅས་ཀྱི་ཆེད་ཚན་ཡན་གྱི་རིག་གནས་ཆུ་ཚད་ལྡན་པའི་གཞོན་ནུ་བཅས་བསྡུ་རྒྱུ་རེད། དམག་མི་བུ་མོའི་ནང་མཐོ་རིམ་སློབ་འབྲིང་དཀྱུས་མའི་ལོ་འདི་གའི་སློབ་ཐོན་སློབ་མ་དང་། མཐོ་རིམ་སློབ་འབྲིང་དཀྱུས་མའི་ཉིན་གང་ལམ་ལུགས་ཀྱི་ལོ་འདི་གའི་སློབ་ཐོན་སློབ་མ། སློབ་གྲྭར་ཡོད་མུས་ཀྱི་སློབ་མ་བཅས་བསྡུ་རྒྱུ་ཡིན་པ་དང་། ད་དུང་2020ལོའི་མཐོ་རིམ་སློབ་གྲྭ་དཀྱུས་མའི་ཉིན་གང་ལམ་ལུགས་ཀྱི་ལོ་འདི་གའི་སློབ་ཐོན་སློབ་མ་འདི་ལོའི་ལོ་སྟོད་ཀྱི་དམག་མི་བུ་མོ་བསྡུ་བའི་ནང་ཐོ་འགོད་ཆོག་གི་ཡོད་པ་རེད།