（པར་ངོས་དང་པོར་མཐུད） མི་སྐྲག་པ། འཇུངས་མེད་ལེགས་སྐྱེས་ཕུལ་བའི་སྙིང་སྟོབས་དར་སྤེལ་གཏོང་དགོས་པའི་སྐུལ་མ་གནང་བ་རེད། ཕུར་བུ་དོན་གྲུབ་ཀྱིས་འབྲེལ་ཡོད་འགན་འཁུར་མི་སྣའི་སྙན་ཞུ་དང་རིམས་འགོག་བྱ་ཐབས་དོན་འཁྱོལ་གནས་ཚུལ་ཞིབ་ཕྲ་གསན་རྗེས། ཁོང་གིས་རིམས་ནད་ནི་བཀའ་རྒྱ་དང་། རིམས་འགོག་ནི་འགན་འཁྲི་ཡིན་པས། གྲོང་ཁྱེར་ཡོངས་ཀྱི་རིམ་ཁག་སྨན་བཅོས་ཚན་པས་རིམས་ནད་སྔོན་འགོག་ཚོད་འཛིན་ལས་ཀའི་ཇུས་གཞིའི་བླང་བྱ་གཞིར་བཟུང་། གོམ་གང་མདུན་སྤོས་ཀྱིས་གྲལ་བཤེར་དང་། ལྟ་ཞིབ། ལོགས་དབྱེ། བཅོས་སྐྱོབ་སོགས་ཀྱི་ལས་ཀའི་བརྒྱུད་རིམ་ཚད་ལྡན་དུ་གཏོང་བ་དང་སྦྲགས། ངེད་གྲོང་ཁྱེར་དུ་རིགས་འདྲའི་ནད་དཔེ་མི་ཐོན་པའི་དམིགས་ཚད་མངོན་འགྱུར་ལ་འབད་དགོས་པའི་ནན་བཤད་གནང་།
ཕུར་བུ་དོན་གྲུབ་ཀྱིས་གྲོང་ཁྱེར་དངོས་ཟོག་གྲབས་གསོག་མཛོད་ཁང་དང་གྲོང་ཁྱེར་འཕེལ་སྒྱུར་ཨུད་དུ་ཕེབས་ཏེ། ས་ཡུལ་དངོས་སུ་སྨན་བཅོས་དངོས་ཟོག་དང་འཚོ་བའི་དངོས་ཟོག་གྲབས་གསོག་གནས་ཚུལ་ལ་རྒྱུས་མངའ་ཞིབ་ཕྲ་གནང་བ་རེད། ཁོང་གིས་འབྲེལ་ཡོད་ཚན་པས་ཐབས་ལམ་སྣ་ཚོགས་བརྒྱུད་ནས་དགོས་མཁོ་བསྐོང་ཐུབ་རྒྱུར་འགན་སྲུང་བྱེད་དགོས་པའི་བླང་བྱ་བཏོན་གནང་བ་རེད།
ཧུའེ་ཧའོ་སྒོ་རྩིས་ཁང་ནི་ལྷོ་ཁའི་མང་ཚོགས་ཀྱིས་རྣམ་ཀུན་མཁོ་ཆས་སྒྲུབ་ས་ཞིག་ཡིན་སྟབས། ཕུར་བུ་དོན་གྲུབ་ཀྱིས་སྟབས་བསྟུན་ངང་འདི་གར་ཕེབས་པ་དང་། ཁྲོམ་རའི་མཁོ་སྤྲོད་དང་མང་ཚོགས་ཀྱི་དགོས་མཁོའི་གནས་ཚུལ་ཤེས་རྟོགས་ཞིབ་ཚགས་གནང་རྗེས། འདི་གར་མཁོ་དངོས་སྒྲུབ་བཞིན་ཡོད་པའི་མང་ཚོགས་དང་མཛའ་བརྩེའི་བཀའ་མོལ་བརྒྱུད། ཟོག་གོང་གང་འདྲ་ཡོད་མེད་ཀྱི་གནས་ཚུལ་ལ་རྒྱུས་མངའ་གནང་བ་རེད།
ཁོང་གིས་སྒོ་རྩིས་ཁང་གི་འགན་འཁུར་མི་སྣར་མུ་མཐུད་ནས་མཁོ་སྤྲོད་ཀྱི་ལས་དོན་ཡག་པོ་སྒྲུབ་སྟེ། ཚོང་ཟོག་གི་རིན་གོང་བརྟན་པོ་རྒྱུན་འཁྱོངས་བྱེད་དགོས་པ་མ་ཟད། རིམས་འགོག་གི་བྱ་ཐབས་ཁག་དོན་འཁྱོལ་ནན་པོ་སྒོས། མང་ཚོགས་ཀྱི་མཁོ་ཟོག་སྒྲུབ་རྒྱུར་སྟབས་བདེ་དང་བདེ་འཇགས་སྐྲུན་དགོས་པའི་མངགས་བྱ་གནང་བ་རེད།
དེ་རྗེས། ཕུར་བུ་དོན་གྲུབ་ཀྱིས་ཤམ་ཆུའི་མགྲོན་ཁང་དང་། ལན་ཐཱན་ཚོང་དོན་མགྲོན་ཁང་། ལྷོ་ཁའི་མགྲོན་ཁང་བཅས་སུ་ཕེབས་ཏེ། ས་ཡུལ་དངོས་ནས་གནས་གཏན་འཁེལ་ཟིན་པའི་གསོ་རིག་ལྟ་ཞིབ་ཁང་གི་རིམས་འགོག་བྱ་ཐབས་དོན་འཁྱོལ་གནས་ཚུལ་ལ་གཟིགས་རྗེས། ཁོང་གིས་གནས་གཏན་འཁེལ་ཟིན་པའི་གསོ་རིག་ལྟ་ཞིབ་ཁང་ནི་རིམས་འགོག་ལས་དོན་ཁྲོད་ཀྱི་འགངས་ཆེའི་ལས་ཀ་ཞིག་རེད། ངེས་པར་དུ་གསོ་རིག་ལྟ་ཞིབ་བྱ་ཡུལ་མི་སྣའི་འཚོ་བའི་འགན་སྲུང་ལས་དོན་ཞིབ་ཚགས་སྒྲུབ་ཐོག ཁོང་ཚོའི་དངོས་ཡོད་དཀའ་ངལ་སེལ་རོགས་བྱས་ཏེ། འབྲེལ་ཡོད་ཀྱི་དུག་སེལ་དང་། ལུས་དྲོད་བརྟག་བཤེར་སོགས་དོན་འཁྱོལ་ཡག་པོ་སྒོས། སྔ་ཙམ་ནས་ནད་བརྟག་དང་། སྔ་ཙམ་ནས་སྙན་ཞུ། སྔ་ཙམ་ནས་སྨན་བཅོས་བཅས་ཡོང་རྒྱུར་འགན་སྲུང་བརྒྱུད། རིམས་འགོག་ཀྱི་སྲུང་རག་བཙན་པོ་འཛུགས་དགོས་པའི་ནན་བཤད་གནང་བ་རེད།
