མི་དམངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་70འཁོར་བར་རྟེན་འབྲེལ་ཞུ་བའི་བྱེད་སྒོའི་མཚོན་རྟགས་ཡོངས་བསྒྲགས་བྱས་པ་རེད།
བྱེད་སྒོའི་མཚོན་རྟགས་ནི་ཨང་ཀི“70”དང་རྒྱལ་ཁབ་ཀྱི་གཟུགས་བརྙན་མཚོན་པའི་རྒྱལ་རྟགས་དང་སྐར་ལྔ་དང་དེ་བཞིན་གནམ་བདེ་སྒོ་མོ་འཆར་འགོད་ཀྱི་གཞི་རྒྱུ་གཙོ་བོར་བྱས་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་70འཁོར་བར་རྟེན་འབྲེལ་ཞུ་བའི་བྱེད་སྒོའི་བརྗོད་དོན་གཙོ་བོར་དམ་པོར་དམིགས་པ་རེད། བྱེད་སྒོའི་མཚོན་རྟགས་ཁྲོད་ཀྱི“70”དེ་ལོ་རྒྱུས་ཀྱི་ཤོག་ལྷེ་གསར་པ་ཕྱེ་བའི་མཐོང་ཚོར་གྱི་ནུས་པ་ཐོན་རྒྱུའི་འཆར་འགོད་བྱས་ཏེ་ཏང་དང་རྒྱལ་ཁབ་ཀྱི་བྱ་གཞག་ཁག་གི་རྣམ་པ་གསར་རྐྱང་མངོན་གསལ་དོད་པ་དང་། དེ་ལས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་པ་དང་། ཀྲུང་ཧྭ་མི་རིགས་ཀྱིས་འབད་འབུངས་ལྷོད་མེད་ངང་ལེའུ་གསར་པ་བརྩམས་པ་མཚོན་གྱི་ཡོད། “7”ཡི་བཟོ་དབྱིབས་དེ་དུས་ཆེན་གྱི་དར་ཚོན་དང་འདྲ་བར་གཡོ་བ་ལྟ་བུའི་ནུས་པ་ཐོན་པ་དང་མངོན་གསལ་དོད་པའི་གསེར་མདོག་ལངས་གཟུགས་ཀྱི་རྒྱལ་རྟགས་དང་སྐར་ལྔ། དེ་བཞིན་གནམ་བདེ་སྒོ་མོ་འཁོད་པའི་སྒོར་དབྱིབས་དེ་ལས་འགུལ་བ་དང་འགུལ་མེད་ཀྱི་རྣམ་པ་གྲུབ་ནས་དེས་ལོ་རྒྱུས་ཀྱི་རྒྱབ་ལྗོངས་ཟབ་མོ་མཚོན་པ་མ་ཟད་དུས་ཆེན་གལ་ཆེན་གྱི་དགའ་སྟོན་རྣམ་པ་ཡང་མཚོན་གྱི་ཡོད་པ་རེད།
བྱེད་སྒོའི་མཚོན་རྟགས་དེ་ས་གནས་ཁག་དང་སྡེ་ཚན་ཁག་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་70འཁོར་བར་རྟེན་འབྲེལ་ཞུ་བའི་བྱེད་སྒོའི་ཁོར་ཡུག་བཀོད་སྒྲིག་དང་མང་ཚོགས་རང་བཞིན་གྱི་བརྗོད་དོན་གཙོ་བོའི་སློབ་གསོ་བྱེད་སྒོའི་མཁོ་ཆས་བཟོ་བའི་ནང་རྒྱ་ཁྱབ་སྤྱོད་ཆོག་གི་ཡོད་པ་རེད།
